北京之旅 - 2009 [第三天] (五) 大董

2010 年 1 月 1 日
水立方/ 鳥巢 →天安門 →人民英雄紀念碑 →故宮博物館→胡同→什剎海 →南鑼鼓巷→ 大董烤鴨店 → 東方大班按摩
今晚我地去左好多人都推介既北京大董烤鴨店, 呢間係人氣店, 一定要訂位, 我地原先諗住唔想咁趕, 打算訂七點半, 不過俾佢地拒絕左, 要係六點半前到, 所以未行完南鑼鼓巷都要趕住撤退.

黎到時已經有好多人等位, 呢度都有熱茶招呼等位既客人, 唔錯.

佢地既餐牌仲厚過一本書, 而且唔係叫餐牌, 係叫做‘大董烹飪藝術作品集', 勁, 每道菜都有詳細介紹，又有精美插圖配合，要欣賞完呢本品集，閒閒地一粒鐘．

佢地既菜式好著重創意，賣相同美感，而且物盡其用，好多鴨肝，鴨舌，鴨掌，鴨心等既菜式，我地今次唔試住，留番下次先食．

佢既招牌菜，大董酥不膩烤鴨，我地點左半隻, 師傅攞隻鴨黎片時, 係成隻, 片左一半就攞走, 如果點成隻, 隻鴨殼會包番俾客人帶走.　

好靚呀，呢半隻多過我地早兩晚係花家怡園食個半隻．

配菜好多款，有青瓜絲，白蘿蔔絲（染紅了），蒜泥，白砂糖，大蔥段，烤鴨醬同兩款醃菜．

除左薄餅皮外，仲有兩個燒餅．

侍應無教我地點樣食呢個烤鴨，返黎上網見有網友提到，佢地去食大董時，有侍應無教佢地點樣食
1.  只把一片皮醮白砂糖，然後放在舌頭上，呢個吃法好得！香脆無比，入口即溶．
2.  把白蘿蔔絲，蒜泥，烤鴨醬和兩片帶皮的肉放進芝麻燒餅，好有口感，燒餅和烤鴨配得好好．
3.  平常食法/悉隨尊便．
而家至知，遲左少少．
我地點左江雪糖醋小排，點既時候無為意佢係冷盤，味道適中，酸酸甜甜，好開胃，伴碟既話梅都好味，只係排骨既肉硬左少少．

賣相考究，盛菜既唔係碟，係一塊別緻既石頭．

佢地有好多蔬菜既菜式都好特別，不過當日我又嫌太花巧，所以只圔點左個清炒油麥菜，呢個油左少少．

呢度同一般京菜館唔同，無餃子飽點，我地就叫左個牡蠣香米飯，兩隻蠔都好大隻，好多汁，飯就似係醬油撈飯．

之後既野食係送既．
鴨湯，清清地，都幾好．

甜品，芝麻糊，好杰，似開粉．

杏仁茶，ok.

生果盤，哈蜜瓜，好脆好甜．

大董出名，裝修高貴舒適，服務殷勤，不過係呢間分店，我就唔係好感受到出色既服務，耐心既介紹固然無啦，我地仲見到高級既侍應為了小事係我地面前責罵初級侍應，純為出氣，唔係為件事好，侍應們之間又表現唔友善，其實佢地仲有其他分店，可能會好過呢間．

大董係要收加一服務費的, 整體黎講, 我覺得大董唔算係非試不可, 不過有時間都不妨一試,

大董烤鸭店　(团结湖店)
地址: 朝阳区团结湖北口3号楼(长虹桥东南)
电话: 010-65824003 65822892
 
飯後，我地仲有餘興節目，前兩晚，朋友介紹了一間按摩店〔東方大班水療按摩〕給我地，經過兩天既緊湊行程，我地都好想嘆番個腳底按摩，我地都揀左做九十分鐘既足療保健按摩，168元，雖然唔平，但個度環境唔錯，裝修雅致，十分乾淨，按摩師水準好專業，唔似深圳同澳門有些按摩師水準唔穩定, 佢地好樸實, 好專心同你按摩, 唔會吱吱咋咋噪死你, 但你有問題問佢地, 佢地又好熱心答你.
佢地都有提供免費食物同飲品，新鮮榨既雪梨汁都幾好．朋友提醒我地，佢係會員，講佢個手機號碼可能有折扣，果然佢地俾左八折我地．原來佢地都有好多分店，唔錯，唔錯．
 

東方大班水療按摩 (温特莱店 )                                                      

北京市朝阳区西大望路1号温特莱中心B座101

电话 : 86 ( 10 ) - 6538 8086