北京之旅 - 2009 [第三天] (四) 什剎海/南鑼鼓巷

2010 年 1 月 1 日
水立方/ 鳥巢 →天安門 →人民英雄紀念碑 →故宮博物館→胡同→什剎海 →南鑼鼓巷→ 大董烤鴨店 → 東方大班按摩
食飽左一大堆老北京小吃, 我地就行過去什剎海, 什剎海係由西海、後海以及前海三部分組成，三湖一水相通，什剎海名為海，實為湖.

呢度既湖景出名好靚, 沿湖邊有好多餐廳, 酒吧, 晚上好熱鬧.

但好似而家咁凍既天氣, 好易冷親, 所以我地趁天未黑就黎行下, 而且我地想睇下湖上溜冰既場面, 因為每年好凍好凍既時候, 當'前海'結成厚冰後就會開放做溜冰場, 聽講今年早左開, 我地有幸遇上.

正式的入場卷係十蚊一個人, 我地聽到在入口負責收入場卷的工作人員同一些想入場既人講, 呢度俾五蚊就可入場 ! 唔駛奇怪, 類似既場面, 我地係沙巴都見過.

其實唔係所有入場既人都有租溜冰鞋, 好多都只係入黎行下, 我地都唔蝕底, 買左飛入黎感受下企係湖上既感覺.

好攪笑, 入到黎仲見到好多人玩呢款用木椅, 鐵架改裝成既溜冰車, 佢地要好辛苦用類似燒烤义係冰上篤下篤下, 部車至會慢慢郁, 好騎呢!

第一次係冰湖上行都幾得意, 不過冰面真係幾滑, 要小心唔好跣親.

呢度真係好靚, 當日其實前海連接住後海既地方都仲未結成冰.

行過d 去後海那邊, 湖面都結了冰, 有人爬左落去行冰, 呢邊係免費既!

聽說係什剎海附近除左好多酒吧, 餐廳外, 仲有好多特色小店賣得意野, 不過我地今次未見到, 因為我地想爭取時間去埋南鑼鼓巷.

行左十五分鐘, 我地終於到左南鑼鼓巷.

呢度好多咖啡室, 好悠閒, 好舒服.

仲有好多有特式的小商店, 如果有時間慢慢逛, 應該會有好多收穫.

我地都買左d 得意簿仔, 十蚊一本, 但簿仔背面標價係三十八蚊港紙一本.

行左一個鐘頭, 就天黑喇, 呢度夜左都好靚.

如果下次再有機會黎, 我會預多些時間, 起碼要坐下咖啡室, 悠閒d 感受深d 呢度既氣氛.

我地走既時候, 遊人都仲好多, 唔記得打聽下d 舖頭幾點休息.