北京之旅 - 2009 [第一天] (上)

2009年 12 月30 日
機場 -> 酒店 -> 雍和宮 -> 國子監 -> 簋街 -> 晚餐 @花家怡園 (四合院店)
經過差不多六個多鐘頭的飛行, 由三十多度既地方去到一個零下幾度既地方, 實在有點刺激, 加上遇著一個唔太醒目既的士司機, 明明已經見到我地入住既酒店, 但係兜極都兜唔到去門口, 有點唔耐煩之下, 做左個衝動既決定 - 落車自己行, 但又唔記得自己未裝備好, 只係著左一件長袖衫同羽絨, 下午四時左右, 太陽伯伯已經開始收工, 風又大, 雖然只係行左三分鐘左右, 都有點難捱, 忍唔住都要鬧自己一句 - 點解咁蠢!
今次我地住係假日快捷酒店 (民族園) Holiday Inn Express, Beijing Minzuyuan, 因為貪佢夠平, 樣同地點都唔差, 近地鐵站, 上網訂, 只係四百蚊港紙一晚, 包早餐同上網.

 

如果自己無帶電腦, 大堂仲有幾部電腦可用, 都唔錯!

攞左房, 放低行李, 開左電腦同屋企人報告平安, 打電話同朋友確定食飯地點同時間, 變身加衫後就準備出發, 其實今日無準備特別既行程, 因為約左朋友七點半係簋街食飯, 所以打算搭地鐵由北土城站到雍和宮站, 象徵式睇睇雍和宮同國子監, 沿雍和宮大街一直行, 就會到簋街, 當然沿途找些小食, 因為我地已經好肚餓.
行出酒店, 轉左入大街後, 就見到有燴蕃薯, 即刻買番個黎醫下肚, 蕃薯好甜, 但燴得唔夠乾同唔夠熱, 天氣咁凍又點會熱呢 ?
地鐵好多人, 因為正值放工時間, 而且搭地鐵好平, 搭幾多個站都係兩蚊, 轉線就麻煩過香港少少, 要行得比較遠.
出左站, 天已經黑哂, 好大風, 發覺唔記得帶手套, 就算放對手入羽絨袋內都於事無補, 都係凍到手指麻痺同好痛, 真係原來全身有幾暖都好, 少了對手襪, 係絕對唔可以捱得好耐.
求其影幾張相就去搵野食.

見到有檔串燒, 唔理得附近好大風沙, 要了串雞心同雞翼.

好香孜然粉味, 辣辣地, 好好味.

見到熱辣辣既白菜豬肉飽, 梗係唔放過, 暖下隻手都好呀.

再行, 見到有一間類似超級市場既舖頭, 真係忍唔住要入去取暖, 二十隻手指已經凍到硬哂, 難為我老公仲影到相.
又有驚喜發現, 係舖頭中間有一檔類似車仔麵既正宗麻辣燙, 每串食物只係六毫子, 自助形式, 捧住隻碟, 鍾意邊串就攞邊串, 食完至計數, 有幾個姐姐好高興, 好似係到食緊自助餐一樣.

我地都唔執輸, 食左幾串打下底, 至再行過, 雖然價錢平, 但做得好認真, 好好味!