日式牛扒蓋飯 + 雜菜沙拉

鍾意食飯既我, 對於日式蓋飯都好喜歡, 無論天丼, 牛丼, 親子丼, 豚肉生薑燒丼, 落到我手, 多數都一粒都無剩, 除非真的太難食.
尋日想食牛扒, 就想起日式牛扒蓋飯, 用埋雪櫃裡既食材, 做埋個雜菜沙拉, 平衡番個油膩感, 而且健康一點.

我無買和牛, 買左美國牛, 因為鍾意肉味濃d, 要件厚切, 瘦個邊俾老公, 肥個邊就由我負責.

我好貪心, 飯面舖左個味醂日式醬油磨菇洋蔥煮既滑蛋, 牛扒只用鹽同胡椒煎, 煎好就擺數分鐘, 等肉汁返位, 至切成厚片, 放係飯面.

醋汁既雜菜沙拉, 都幾開胃.

較肥個邊既牛扒太厚, 煎完切開見太生, 所以再煎多一陣, 賣相無咁靚, 但一樣好好味, 勁多肉汁,  我當然又食到一粒都無剩喇.