睇番轉頭, 由雲頂集團係2006年12月嬴得發展聖陶沙名勝世界的經營權到而家, 都已經三年有多, 至於賭場幾時開張, 聽講就話等緊政府審批同發牌.
趁今日星期六, 我已經忍唔住, 好想入去先睇為快.
我地搭Sentosa Express 入去, 係 Imbiah 個站到出, 但係搵唔到指示去酒店, 睇地圖又仲未有新酒店既位置, 我以為佢地都已經正式營業, 應該有好清楚既指示, 照睇應該係呢條天橋過去新酒店, 但而家未攪掂, 有木板欄住.
結果我地唯有橫過馬路,
之後就行呢條車行既路落去, 有d 危險.
第一間酒店係 Hotel Michael, 大堂比較平實.
我就唔係好鍾意呢度, 太普通之餘, 氣氛好沉悶.
隔離呢間 Crockfords Tower 只係招待會員貴賓 VIP, 應該主要係賭場大客.
比較華麗有氣派一些.
有工作人員負責把守門口, 一概無邀請咭都唔俾入.
第三間係 Festive Hotel 節慶酒店, 工作人員既製服好薯呀.
呢間最多人聚集, 最熱鬧.
七彩繽紛既燈籠型吊燈, 好搶眼同感覺好開心.
最後一間, Hard Rock Hotel, 其他酒店都係室內貫穿哂, 唔需要走出室外, 但Hard Rock 似乎係自己獨立一座, 有無地下通道就唔知喇.
大堂燈光比較暗, 走型仔路線, 一出大堂, 就係泳池, 可能太多非住客走入去八卦, 所以有繩欄住唔俾外人走近, 而且有好幾位工作人員負責睇實.
行左咁耐, 最有渡假感覺就係呢度, 個泳池好靚唔算細, 但都唔係好大, 如果酒店爆滿, 想係泳池搵個位都難. 比起擁有聖淘沙最正泳池既聖陶沙香格里拉酒店, 就擠迫左d.
係Crockfords Tower 同 Festive Hotel 中間有條類似名店街, 有十數間名牌店, 規模唔算好大, 同澳門威尼斯人無得比.
賭場位於名店街同 Festive Hotel 中間, 經過呢個門口, 穿過自動電梯就到.
而家當然無得入賭場喇.
有別一般賭場, 睇黎開業後要拍咭至可進入. 聽講為左表示唔鼓勵新加坡居民賭錢, 新加坡居民要俾星紙100蚊入場費至可以入賭場.
話就話賭場已經準備就緒, 隨時可開門做生意, 但其實附近仲有好多工程做緊, 噪音大到令人頭痛.
行完哂, 我地去番 Festive Hotel 地下間咖啡店飲野, 呢度都坐得好舒服, 服務員都好有禮貌, 好好笑容.
凍檸茶同熱咖啡.
我想食走牛油芝士既三文治, 但佢地d 三文治全部都係整定, 滿足唔到麻煩既我, 老公食朱古力撻, 我試左少少, 嘩, 好奶呀, 係奶撻黎就真!
離開時, 見到環球片場既過山車正做緊測試, 咦, 好似好快就開得咁, 但之後搭車時, 係高d 既角度睇, 有d 地方都仲好似地盤, 希望佢地趕工加油, 可以係三月尾前快d 攪掂.
嘩...你咁快就去巡察業務喇, 快手啊!
ReplyDelete[版主回覆01/25/2010 19:10:00]哈哈, 我趕住去收租呀 !
Hello 你好!!! 你個 blog 好正, 我 3-4 年前都去過聖淘沙, 覺得好靜, 人都唔多個, 事隔幾年原本改變咗咁多, 等環球影城開咗一定要再去玩吓。
ReplyDelete[版主回覆02/07/2010 01:14:00]Welcome to my blog! 多謝你既讚賞! 聖淘沙真係唔同哂!
我之前都有入去參觀晒佢個幾間hotel 的rooms..真係又大又靚...
ReplyDelete[版主回覆03/09/2010 22:25:00]咁邊間酒店最好呢 ? 價錢好似差不多.
Crockfords Tower..最靚,but VIP only ,我最愛Festive Hotel,因為內有famliy room,地方大,而且最少可以住4大2小......正!至於Hard Rock .....太遠啦...房間以白色紫色為主,唔係我杯茶
ReplyDelete[版主回覆03/10/2010 13:13:00]我自己都係鍾意 Festive Hotel 多d, 不過可惜個泳池普通左d.
d酒店可以行入去睇架可?
ReplyDelete[版主回覆03/24/2010 13:21:00]Crockfords Tower就唔入得, 另外個三間, 基本上地下個層都任人行, 我地無搭 lift, 因為多數酒店既lift 都要用咭.
HI Hi
ReplyDelete我會响31/3去新加坡住節慶酒店3晚...請問裏面揾食會好難嗎?另去環球影城需搭車嗎?因我有大至6x的媽媽and細至12yrs and 7 yrs 的仔女.............^~^ pls thx????
[版主回覆03/24/2010 17:38:00]我估搵食唔會好易, 上次我地飲下午茶都要等位, 除左係裡面搵食, 其實都可以出番去最近既商場 - Vivo City到搵食．
由酒店去環球片場，唔駛搭車架喇！玩得開心ｄ啦．
Dorothy
ReplyDeletethanks your help^~^ 另Vivo city 要搭車嗎???and最夜收幾點呀?and我哋住節慶酒店方便嗎?有冇嘢啱小朋友玩?e.g 沙灘or滑水梯因為第一晚and最尾晚住烏節路Grand hyatt 這裏有嘢食嗎?many thx
[版主回覆03/27/2010 17:12:00]由節慶酒店到Vivo City可以搭Sentosa Express, 約十分鐘就到，你可以問下酒店會唔會有車票俾住客，我地上次住聖淘沙既Rasa Sentosa Resort (Shangri-la), 酒店都有免費飛俾我地．
聖淘沙有幾個沙灘，其中Palawan Beach 度有個吊橋，都幾靚，小朋友可以玩水同沙，都幾好，你可以睇下下面條link 就知點去：
http://www.sentosa.com.sg/explore_sentosa/attractions/redirectmap.html#map=sentosa_resortsworld&state=resorts
烏節路Grand hyatt都好方便，好近最近新開既商場ION Orchard, 有好多餐廳同有個美食廣場係B4 層（Food Opera), 另外ION Orchard 隔離個座 Wisma Atria，四樓有個Food Republic, 都有好多野食，其中福建炒蝦麵都好值得試．
我預計七月底帶媽媽來新加坡4日3夜自遊行,主要去環球影城及night safari ,初步胡亂選住swissotel merchant court /carlton,請問去上述兩個地方方便嗎?在旅程方面還有甚麼適合老人家玩的地方,請介紹
ReplyDelete[版主回覆04/08/2010 09:10:00]swissotel merchant court 同 carlton 都算方便, 兩個附近都有商場同地鐵站, swissotel merchant court 係河邊, 對面就係 Clark Quay, 好多餐廳同酒吧, 酒店同附近環境都好靚, carlton 附近既商場 Raffle City 就比較大, 都有好多餐廳, 酒店對面Chijmes 係一個好靚既教堂, 改建做好多間餐廳同酒吧.
旅程方面還有甚麼適合老人家玩的地方 - 呢個好難講, 大家都知新加坡係一個比較悶蛋既地方, 食既方面就精彩d.
其實sentosa 除左環球影城同賭場外, 仲有其他地方可以行同玩, 你可以睇下佢地既 website ( http://www.sentosa.com.sg/ ) , 跟你媽媽既喜好揀選下.
至於Night Safari, 我自己就唔係咁鍾意黑'媽媽', 睇到既野唔夠日間既 Singapore Zoo多, 穩陣d 記得帶蚊貼或蚊怕水.