水立方/ 鳥巢 →天安門 →人民英雄紀念碑 →故宮博物館→胡同→南鑼鼓巷→什剎海 → 大董烤鴨店 → 東方大班按摩
睇完鳥巢, 繼續搭地鐵到天安門東站, 沿途轉左三次線 (八號 -> 十號 -> 五號 -> 一號), 迫完一大輪後, 終於到左天安門廣場, 好多人呀.
毛澤東紀念館前遊客大排長龍, 簡直係打蛇餅.
人民英雄紀念碑.
呢隻看門口的石獅子個樣好奸呀!
俾四十蚊一個人, 穿過呢個'午門' 就可入去故宮博物館.
我地有租電子講解機, 十蚊一部, 有廣東話既, 其實我地都覺得一路聽一路行係好d既, 唔會睇到一舊雲, 係入口附近都有好多人問你要唔要導遊, 我地無問價錢, 因為覺得佢地好煩, 不過後尾諗番, 如果搵到一個把聲好聽, 又知得多野既導遊其實都唔錯.
呢度真係超大, 唔怪得, 故宮係全世界最大既皇宮!
唔好要我行哂呀!
太和殿外, 就係皇帝見文武大臣既地方, 如果皇帝有個別事件要接見大臣, 就會在太和殿接見他們.
太和殿係第一個殿, 維修得好好.
黎到我先知道, 原來遊客係唔可以行入去宮裡面, 宮外欄住哂, 只可係出面隔住圍欄望入去, 試想像同一時間咁多遊客, 邊會睇得清楚? 再者, 裡面係好暗, 唔夠光點睇到喎? 連射燈都慳番, 收埋咁多入場費, 都唔考慮下遊客既感受, 唔係所有人都只想睇宮殿既建築.
呢度係保和殿既裡面, 當然又係欄住唔俾入喇, 呢張相係我老公用左相機既特別效果至影到咁清楚, 睇張相仲清楚過我係現場睇實物, 更何況我根本就迫唔到埋去睇.
乾清門
乾清宮既內貌 - 當然我都係同你地一樣, 睇相先知裡面原來係咁樣既!
坤寧宮 - 漙儀大婚頭三日住既地方. (下面兩張相係隔住玻璃影既)
御花園, 又無想像中咁大咁靚.
御花園中有好古樹.
我地今次只係行左中間大既宮殿同御花園, 已經差不多兩個鐘頭, 但我感受唔到皇帝奢華既生活, 因為可見既野唔多, 連為皇帝準備膳食既御廚房都無得睇.
失望 !
No comments:
Post a Comment