北京 2009 [第四天] (四) 麻辣香鍋

2010 年 1 月 2 日
祟文門菜市場 -> 天壇-> 七九八藝術區 -> 晚餐: 麻辣香鍋 -> 水立方 / 鳥巢夜景
川成元麻辣香鍋, 係blog 友介紹既, 我第一次睇既時侯, 以為係麻辣火鍋, 不過睇清楚, 又無火又無湯, 唔會係火鍋, 原來係將客人揀選既食材, 用祕製麻辣鍋底煮成, 無汁既, 麻辣程度分五級, 客人可選自己鍾意既辣度,而食材有超過一百種可選, 雖然係同一鍋底, 但配搭相當多元化.
睇過大眾點評既評語, 好多人話川成元既口味比較其他同類食店正宗, 好味, 評分都幾高, 食物種類多, 好多當地人幫襯, 佢地仲會將吃剩的打包回家, 而且呢種美食, 我未係香港同新加坡見過, 所以決定要安排時間爭取機會一試呢款地道美食.

我地五點半鐘係七九八藝術區離開, 因為七九八唔近地鐵站, 唯有搭的士, 但我地等左好耐都等唔到的士, 加入等車既人多, 的士少, 無的士站排隊, 突然有人係我後面問'你們去那裡?' 我擰轉身一望, 係一個私家車司機問我地, 我地唯有話俾佢知, 我地既目的地, 其實唔係好遠, 佢開價十五蚊, 價錢合理, 我地唔打算講價, 只係諗, 白牌車, 上定唔上? 結果我地都係上左.
黎到川成元, 餐廳有兩層都幾大, 差不多坐滿, 唔覺有遊客.

餐牌精緻, 分門別類, 見到樣樣都想試, 可惜無得點半份.

最後我地精選了八樣, 落單前問侍應, 通常兩個人點幾多款, 侍應話六款應該好夠, 嗯, 八款都唔係好過份, 夠唔夠呢 ?

呢間工作室, 應該係負責執食材, 都幾企理乾淨.

等左二十分鐘左右, 期間八卦其他食客既檯面, 檯檯都係一大盤紅卜卜舖滿辣椒既香鍋, 見到都興奮.
我地個盤黎喇, 我地要微辣, 即係尾二個級, 嘩, 好香. 我地叫左香酥小黃魚, 三黃雞塊, 牛丸, 油豆皮, 茶樹菇, 蓮藕, 貢菜, 娃娃菜, 原先想試木耳菜 (即上面餐牌個碟), 不過無貨.

好香好惹味, 食落個咀都有麻既感覺, 愈食愈想食, 愈吸味同爽口既食材就最好味, 我最鍾意係茶樹菇, 貢菜同娃娃菜, 雞件都好, 小黃魚就普通, 配白飯最夾, 雖然係微辣, 好似唔多辣椒, 但其實夾夾埋埋都有一個中碗咁多.

我地叫左壺紅棗桂圓茶, 太甜, 要加水.

呢盤係我地夾走左一個中碗既辣椒之後食剩既份量, 我地都食左好多, 不過佢地都好大方, 份量好足, 麻辣香鍋真係幾特別, 我地真係見到好多人打包吃剩既食物, 呢度有特製既打包袋.

川成元麻辣香鍋 (望京店) 

地址: 朝陽區廣順北大街33號望京嘉茂購物中心B1-15A
电话: 010-64755385 84780596
 
食飽後, 我都仲想八卦下隔離既食店, 呢間火鍋店 - 呷哺呷哺, 好多人等位.

價錢唔貴, 一人一爐, 仲有麻辣湯底, 套餐又得, 自選又得, 肉類十幾蚊一碟, 其他只係幾蚊一碟, 好吸引呀, 上網睇過，佢地有幾十間分店，好似香港大家樂．

呷哺呷哺(嘉茂店) Xiabu Xiabu
地址: 朝陽區廣順北大街33號望京嘉茂購物中心B1楼

营业时间: 10:00 – 22:00

 

再行過d, 有一檔叫'加減乘除麻辣燙'.

自助形式, 有d 似新加坡既釀豆腐, 但湯底係麻辣湯.

排得相當整齊, 所有食物都係一串串.

連芫茜都串起, 即刻令我諗起, 中國人工真係好平.

上網睇, 原來呢檔麻辣燙同川成元係同一個集團, 香鍋做得成功後, 就開左另一條線做麻辣燙, 有食客話一定要俾錢加麻醬至夠好味.

 
加減乘除麻辣燙
地址: 朝陽區廣順北大街33號望京嘉茂購物中心B1楼

营业时间: 10:00 – 22:00

 

有機會都想試下呢兩間麻辣店, 原來麻辣真係會上隱架, 如果係機場都有分店就好喇, 可以俾遊客回味多次至離開北京.