北京之旅 - 2009 [第一天] (下) 花家怡園

2009年 12 月30 日
機場 -> 酒店 -> 雍和宮 -> 國子監 -> 簋街 -> 晚餐 @花家怡園 (四合院店)
食完麻辣串串後, 就出發去找今晚食飯既地方 - 花家怡園, 呢間餐廳係北京好出名, 有幾間分店, 朋友話去簋街店, 因為比較有特色, 我地繼續沿著雍和宮大街往南走就是東直門內大街, 即是簋街 (『簋街』是北京一條出名的食街, 掛滿大紅燈籠)
行左無耐, 我地就見到好多大紅燈籠, 又見到有些餐廳寫住 '簋街XX', 心諗, 我地既目標應該不遠矣.

果然, 行多幾個舖位, 就見到花家怡園, 穩陣d就問下出面既帶位員, 簋街係咪得呢間店, 帶位員用佢極度卷脷既普通話講左一堆說話, 我真係聽唔明, 不過都跟左佢入去, 因為太凍喇, 老公顧住影相, 我示意佢入去.

話俾帶位姐姐聽我地三位, 佢就帶我地穿過一些室內既位, 又穿過好熱鬧坐滿客人既庭園, 又穿過好凍既室外地方, 入左一間非常安靜而且只得一張四人檯既廂房, 示意我地坐, 我問帶位姐姐頭先既庭院無檯嗎, 我唔想坐呢間房, 那位姐姐問: 不喜歡嗎 ? 梗係啦, 面壁咩, 三個人都坐房, 我地唔駛傾祕密喎.  之後姐姐就帶返我地出庭園, 安排左一張近表演位置的檯俾我地, 呢張好好多.

安頓好, 叫了茶, 去完洗手間執執個樣, 我放低左一張呢間餐廳既咭片係檯面, 就出去打電話俾朋友, 話俾佢聽, 我地坐低左, 點知道返埋位時, 老公話我地去錯左四合院店, 呢間唔係簋街店, 吓, 唔係呀?

其實我之前印好左張地圖, 放左係袋, 不過頭先太凍, 唔想伸隻手出黎, 所以無睇清楚確定就入左黎, 太凍又無心機聽帶位員講野, 老公唯有再打電話俾朋友, 睇下佢有咩指示, 正培養心理準備要出去再搵過既時候, 老公返黎話, 原來朋友一直都係諗住黎呢間, 佢都唔為意有另外一間! 太好了, 錯有錯著!
我地等埋朋友黎到至點菜, 睇下有咩好介紹, 但朋友話其實呢度既野食一般啦, 不過呢度可以感受四合院既環境, 氣氛熱鬧, 又有表演, 所以好值得試.  其實我家姐上個月都黎過呢度, 佢都話食物普通, 不過環境就好特別.
於是我地就根據自己口味揀野食, 第一樣, 霸王雞, 呢個其實係麻辣雞, 除左雞件外, 有好多配菜, 有青瓜片, 麵條, 麻花, 煎豆皮卷等等, 我覺得都好味, 我地見差不多檯檯都有點呢個.

水煮魚 - 我地揀左桂花魚, 好大鍋, 都幾麻, 如果魚再鮮味就好喇.

上湯四蔬, 呢個都幾好, 有菜心, 青瓜, 雪耳, 雲耳, 雞湯好味.

八爺烤鴨比傳統烤鴨 添了新意, 醬汁多了款式, 連配料都唔只是青瓜, 大蔥, 更多了山楂, 哈密瓜, 菠蘿等等, 我覺得呢個普通, 鴨肉鞋左d.

担担麵都幾香.

北京水餃都好食.

差d 唔記得叫甜品.

豌豆黃 - 做得好好, 好幼滑, 好香.

山楂糕 - 好醒胃, 好幼滑.

芸豆卷 - 原是民間小吃，後成為宮廷小吃, 傳說慈禧太后聽宮外有小販叫賣，便召進宮內品嘗, 命令御膳房制作，芸豆卷成了慈禧的御前御點.  用白芸豆蓉壓成皮包著豆沙餡同砂糖, 好味.

另外既驢打滾同艾窩窩(樣貌類似糯米滋), 我就覺得糯米皮太硬了.
當我地享受緊美食時, 又有好多表演睇, 因為我地坐得好近表演既地方, 所以我地睇得好清楚, 好多坐得比較遠既食客都走到我地附近一齊睇, 當中最精彩既係變面, 表演者既技術一流, 雖然我地同佢好近, 但實在睇唔到有任何破綻.

 
最厲害係最後表演者變番自己個樣時, 佢再變左個面譜上塊面, 嘩, 唔容易呢, 扯走個面譜已經好難, 仲要係一秒內套正個面譜上塊面, 好勁! 不過我地顧住睇, 無影到. 
呢餐真係值回票價, 只要對食物唔好存有太大期望, 可以置身一個咁特別既四合院內, 有高水準既現場表演, 加上可口既食物, 特別既甜品, 遊客係值得一試.
另外朋友介紹左一個好有用的網站 - 大眾點評, 要黎找尋美食, 好似香港既OpenRice, 不過要輸入簡體字.
原來花家怡園係簋街有兩間, 四合院店在235號, 簋街店在 5號, 相距好遠, 感覺都好唔同, 要去一定要到四合院店!
 
花家怡园(四合院店) 
东城区东直门内大街235号
电话: 010-64051908 64030677