北京之旅 2009 - 後記

北京之旅由一場大雪來做個終結, 這場大雪絕對不能講笑, 它打破了自 1951年以來北京日降雪量的紀錄, 它令到2010年1月3日來往北京的九成航機延誤或取消, 當然我們返新加坡的航班都不能倖免, 不過好彩只是延遲了四個半小時, 不需要滯留多一天, 已經算不幸中之大幸.
因為呢日既經歷實在太令屋企人同朋友擔心我地, 所以就等我交待一下先.

原本打算他他條條食個火鍋午餐, 再回酒店退房, 然後搭的士到機場, 但見到路面的交通好差, 的士好似烏龜一樣咁慢, 雖然當時已經知道我地既航班要延遲五十分鐘, 但穩陣些, 都係決定提早坐機鐵到機場.
去到機鐵站, 閘口好多人聚集, 我地準備買票, 唔知點解售票機又失靈, 之後聽到廣播, 話機鐵停開, 吓, 唔好玩喇, 機鐵停開? 點去機場 ? 大家正在鼓譟既時候, 突然間機鐵職員又話下面有一部列車, 閘口職員又開始賣票, 情況再次混亂, 好辛苦買到票, 入到閘, 上到車, 正當列車準備開之際, 我聽到隔離既人話, 呢部車只會去機場第一同第二客運大樓, 唔會去第三客運大樓, 吓, 我地要去第三客運大樓喎, 咁點算? 

無辦法啦, 去左第一同第二客運大樓先算, 應該會有適當的安排.  去到問職員, 佢叫我們上一樓坐免費巴士到第三客運大樓, 安排係有既, 但係咪適當就見仁見智, 上到一樓, 只係見到得一部巴士, 好多人搏老命咁迫上巴士, 明明已經無空間, 都繼續迫, 其實機場一早都知機鐵故障, 點解唔早安排多幾部車, 等乘客唔駛咁慌張, 點解唔安排職員幫手協調下呢? 唔駛好似走難咁!
由酒店到機場, 足足用了一個半鐘頭, 正常既時候, 應該三十多分鐘就可以.
辦登機手續前, 先去洗手間黎個大變身, 將所有禦寒衣物除低, 放入行李箱, 剩番件羽絨傍身, 一刻未飛, 一刻都唔會同件羽絨分開.
登機証上顯示我地既閘口係E11, 去到至發現E11部機係去紐約, 原來我地部機到左北京後, 仲未有閘口可泊位. 係機場等既時候都有電視新聞報告住最新天氣同交通消息, 呢場大雪真係對北京同周邊既地方有好大影響.

等左大半個鐘頭就收到通知, 我地要到E59閘口上機, 去到又有驚人發現, 原來我地要搭巴士到機場中間上機.
再等了一個鐘頭, 終於可搭巴士了, 走出室外, 好凍呀, 好彩有羽絨跟身, 同機有個乘客只著左一件短袖衫, 好慘呢!
機埸地面績雪已經很厚, 第一次踏足停機坪, 落著雪上飛機, 感覺好特別, 不過一次就夠喇!

飛機窗口都結哂冰.

上到飛機已經五點半, 好快就有三文治同水招呼我地, 機師話要等機場人員來幫手清雪同做起飛既準備工夫, 我地至可以起飛, 每隔三十分鐘左右, 機師就會向我地匯報下最新情況, 每次佢講野前, 我都好驚佢會叫番我地落機, 好彩到八點半左右, 我地終於可以飛啦.
雖然今次之行比我地預期凍, 但無影響我地既行程, 我地想去既地方都順利去到, 想食既野都食得到, 北京, 我地會再黎既, 不過唔會係咁凍既時侯喇 !